A Asociación de Pais e Nais de Nenos e Nenas con Problemas Psicosociais, ASPANEPS, é unha Asociación sen ánimo de lucro cun ámbito de actuación estatal, sendo a súa maior área de influencia as comarcas de Ferrol, Eume e Ortegal.
Constituíuse en Ferrol no ano 1980 a partir da iniciativa de pais e nais que buscaban atender necesidades específicas dos seus fillos e fillas de tipo pedagóxico, psicolóxico e social para favorecer un maior grao de benestar persoal e social.
Aspaneps conta en Fene cun programa dirixido aos adultos. Este centro ocupacional conta na actualidade con 23 persoas usuarias e ten servizo de transporte e comedor e unha chea de actividades nas que participan e se implican. O obxectivo e desenvolver tarefas que resulten útiles no día a día das persoas usuarias. Segundo Mar Novo, responsable do Centro en Fene, “é moi importante que saiban decidir”. Tamén se traballa dende ASPANEPS na concienciación sobre o coidado do planeta e uso dos plásticos.
Formación prelaboral, intervención psicosocial, socio educativa, integración comunitaria, atención psicolóxica e terapia ocupacional son as liñas de actuación do centro de ASPANEPS en Fene.
“Moita xente pequena, en lugares pequenos, facendo cousas pequenas, pode cambiar o mundo”. Eduardo Galeano.
CON: Mar Novo, responsable ASPANEPS Fene
REALIZACIÓN: Susana Falcón, EMUGA/RADIOFUSIÓN
