As súas bagas conteñen grandes propiedades nutritivas e medicinais. Pero tamén son antioxidantes, antivirais, antiinflamatorias e antisépticas. Reforzan as defensas e teñen calidades depurativas e antioxidantes.
Marmeladas, viño, cervexas, licores, bombóns. Son moitos os produtos que elabora, desde hai dez anos, a empresa Carabuñas que está a recuperar e por en valor este arbusto.
Detrás de Carabuñas están Eva e Nelson, “Os do sabugueiro”. Desenvolven o seu traballo en Vilar de Santos, unha zona declarada Reserva da Biosfera Área de Allariz pola Unesco. Teñen catro liñas de actuación en torno ao sabugueiro: alimentación, investigación, cultivo e cultura. Queren poñer en valor os recursos naturais, dar unha volta á tradición e sumar na sustentabilidade do rural galego.
O obxectivo é a aproveitar un recurso que estaba abandonado e que conta con moitas propiedades medicinais que eran coñecidas de vello no rural, pero nos tempos modernos, coa emigración ás cidades, os seus valores fóronse esquecendo. Ao longo dos séculos utilizáronse os seus froitos e flores para elaborar xaropes, infusións ou cataplasmas destinados a combater afeccións do sistema respiratorio. Agora, diversos estudos apoian estes remedios con evidencias científicas sobre as propiedades desta planta para paliar os efectos do catarro e procesos gripais.
Desde Vilar de Santos, os seus produtos chegan hoxe a fogares, tendas, bares e restaurantes de toda Europa.
CON: Eva e Nelson, propietarios de CARABUÑAS
REALIZACIÓN: Susana Falcón, EMUGA / Radiofusión
