En Moeche, a Asociación de Emisoras Municipais Galegas – EMUGA impulsou a creación dun grupo motor que permitiu crear e lanzar a campaña Onda ODS Empeza por ti. Este grupo motor, formado por varias entidades tanto públicas como privadas procedentes do tecido sociocultural e económico do municipio, identificou varias prioridades que correspondían co diagnóstico do contexto local en canto á Axenda 2030. Tras varias reunións, decidiu que as consideradas máis adecuadas para levar a cabo a campaña en Moeche foran Igualdade de Xénero, Educación de Calidade e Auga e Saneamento. Os obxectivos 4, 5 e 6 da Axenda 2030 foron os identificados como prioritarios polos asistentes e acordaron por unanimidade incluílos nas actividades a realizar.

No caso do Obxectivo de Desenvolvemento Sostible número 6, de auga potable e saneamento, os participantes quixeron resaltar a importancia de recoller a microtoponimia das fontes e regatos existentes no municipio como unha forma de recoñecer a importancia dos recursos hídricos locais pero tamén como elementos esenciais do desenvolvemento social e histórico das diferentes parroquias.

A situación das mulleres nas zonas rurais, con menor dispoñibilidade de recursos respecto ás mulleres dos pobos e cidades, foi moi importante nas preferencias do grupo motor á hora de seleccionar obxectivos, polo que o obxectivo número 4 apareceu como prioritario na decisión das entidades presentes en Moeche.

O obxectivo número 5, Educación de Calidade, tamén tivo especial apoio porque o Concello só ofrece formación no tramo obrigatorio; para poder desenvolver a formación no tramo postobrigatorio, o alumnado de Moeche ten que desprazarse, necesariamente, a outros concellos, o que supón un obstáculo para moitas familias.

Unha vez identificadas as prioridades, as persoas que formaban parte das entidades do grupo motor e de EMUGA xeraron e gravaron 30 retos cidadáns relacionados con estes eixes que foron posteriormente emitidos ao longo de meses na emisora municipal.